1Jo 2 | KMG | STEP | Naru motecfâc-nane, ŋoŋe sâqocne banšipiŋte dâŋ i qâreŋke-ŋarekopac. Á moc e sâqocne baocmu, ine Mamactao sacfozic-nâŋec Jesu Kristo e tiŋne runezi jukac, irec manasuzejec.

1 John 2

Anutu dâŋticne reŋkehuc erao sâcne qohotazo

1 Naru motecfâc-nane, ŋoŋe sâqocne banšipiŋte dâŋ i qâreŋke-ŋarekopac. Á moc e sâqocne baocmu, ine Mamactao sacfozic-nâŋec Jesu Kristo e tiŋne runezi jukac, irec manasuzejec. 2 Eki hâcne sâqocne-nâŋecte kiwiric rowec, erâ nâŋâcne sawa mâcne, mâreŋ sâc ŋic jaŋere mâmâc rowec. 3 Anutu mana maŋ eeŋgopeneŋ, ine sâcmutâc dâŋticne mana rereŋ epene fuŋne jaŋgeŋkeme mananaŋmu. 4 Á ŋic moc e sâcmutâc dâŋticne mana rereŋ mi ehuc muocmu, “No Anutu mana maŋ eekopac”, ere burecŋic muzo, ŋic iŋucnere maŋko dâŋ fâri qizecne mi fokac. 5 Moc e ine Anuture dâŋ mana rereŋ eocmu, e jâmbomac Anutu maŋjauŋ fârine ecneocmu. Iŋuc ehuc ine Anuturao qohotaeŋgopeneŋ irec fuŋne taniŋkeme mananaŋmu. 6 Moc e Anuturao qohotahuc jukopac muocmu, e Jesu juwec irec sâcko jaha juzejec.

Ââgo erâ tatamacko juhâmozo

7 Jorocfâc-nane, no sâcmutâc dâŋ ɋâricne moc mi qâreŋke-ŋarekopac, i raŋɋane, fuŋnaonec mana wefuhuc jueŋgopieŋ i hâcne. Dâŋ qazu-ŋarekicne irec hâcne sâcmutâc dâŋ raŋɋane mukopac. 8 Erâ dâŋ qâreŋkekopac i sâcmutâc dâŋ ɋâricne wâc ekac, i Jesurao â ŋoŋerao mâmâc fârine ekac. Ine fuŋne šiŋucte: Dapâc raruŋkehame tatamac fârinezi fua tâcnehuc fokac. 9 Eme ŋic moc e âgo-ticne qaisockeekaczi “no tatamacko jukopac” muocmu, ere dapâcko juweczi jukac muzo. 10 Á moc e âgo-ticne maŋzi jauŋkeocmu, e ine tatamacko sâcne juraocmu, ehuc sâqocne bâbâiŋ moc mi bâfuaocmu. 11 Á moc e âgo-ticne qaisockeocmu, e ine dapâcko juocmu â dapâcte hatao raocmu, e dapâcko šâŋe fime qiŋquŋkeme wemocko hata-ticne hone taraocmu.

Kâcɋne piticne dâŋ i mâmâc manazo

12 Naru motec ŋoŋe Jesu šâŋe-ticnere erâ sâqocne bâtâmire-ŋarekicnere dâŋ qâreŋke-ŋarekopac. 13 Mamac ŋoŋe juwarehuc juwec sanaŋ e mana maŋ embiŋte dâŋ qâreŋke-ŋarekopac. ŋicmotec ŋoŋe sâqocne rune sanaŋkecnembiŋte dâŋ qâreŋke-ŋarekopac. Naru motec ŋoŋe Mamac mana maŋ embiŋte dâŋ qâreŋke-ŋarekopac. 14 Mamac ŋoŋe juwarehuc juwec sanaŋ e mana maŋ embiŋte dâŋ qâreŋke-ŋarekopac. Ŋicmotec ŋoŋe sasanaŋ-ŋeŋic fokac â Anuture dâŋzi maŋŋeŋicko fokac â sâqocne rune sanaŋkecnembiŋte dâŋ qâreŋke-ŋarekopac.

Maŋnâŋec mâreŋkopec wiacte mi domazejec

15 Maŋŋeŋic mâreŋko me mâreŋte wiacko mi râepie fozejec. Moc e maŋticne mâreŋko râeme foocmu, e wemocko Mamac maŋjauŋ ecneocmu. 16 Manaŋgopieŋ, mâreŋkopec wiac sasawa: Sahaczi sasec, šâŋezi sasec â maŋzi fefe wiac, i Mamactaonec mâcne, i mâreŋkonec. 17 Eme mâreŋ e sasec wiac-ticnehec siroweocmu, Anuture micdâŋ mana rereŋ eocmu e ine juhuc juocmu sanaŋ.

Kristore râsi qizec fuaocte mukicne

18 Naru motecfâc-nane, dameŋ bembeŋke-jâmbâŋkekac” eme ŋoŋe Kristore râsi qizec fuaocte mukicne i manaŋgopieŋ” eme ši biac râsifâcne bocjaha fuambiŋ juraŋgopieŋ” irec hâcne dameŋ bembeŋke-jâmbâŋkekac i manaŋgopeneŋ. 19 Jaŋe fufua i nâŋâcne ŋondeŋkonec fuambiŋ, â âgo fârifâc-nâŋec juju ine mi jumbiŋ. Jaŋe âgo fârifâc-nâŋec jurâ muzac mi behec-nâponšapiŋ. Behec-nâpombiŋ i fuŋne šiŋuc taniŋkeocte embiŋ: Nâŋâcnehec jueŋgopieŋ jaŋe âgo fârifâc-nâŋec sasawa aricne. 20 Ŋoŋe ine Tiri runezi Mâro rua-ŋarewecte mamanahec sasawa juŋgopieŋ. 21 Ŋoŋe dâŋ fâri qizecne kâuc baeŋgopieŋ muhuc papia mi qâreŋke-ŋarekopac. Aricne, ŋoŋe dâŋfâri manaeŋgopieŋte qâreŋke-ŋarekopac. Erâ wâc šiŋucte: Burec sasawa i ere maŋnaonec mi fuaekac.

Anutu Mamac â ŋokâ mi bârâwiŋ-jofazo

22 Burecŋic i more muzo? Jesu e Kristo aricne, ŋic moczi iŋuc mume ere burecŋic muzo. Mamac â Ŋokâ mic bacjofaocmu, ŋic ere muzo, e Kristore râsi qizec. 23 Moc e Ŋokâ mickeocmu, e Mamac mâmâc qikiŋneocmu, â moc e Ŋokâ muɋaɋackeocmu, e Mamac mâmâc sakareocmu. 24 Fuŋnaonecteaŋ mitidâŋ mana warehuc jumbiŋ i hâcne maŋke junšepieŋ. Mitidâŋ i maŋke jupie Ŋokâ â Mamac jahe iŋuc jaha maŋŋopahuc junicmu. 25 Wiac i Jesuzi biŋe qanârewec, juju sanaŋ hâcne.

Mâro ruarâ juku Jesurao qacfiric domazo

26 Maŋ bâsifuc eŋareeŋgopieŋ jaŋere dâŋ iŋuc qâreŋke-ŋarekopac. 27 Ŋoŋere ine šiŋuc mukopac, Mâro rua-ŋarewec i ŋoŋerao foocmu, irec wemocte ŋic moczi mu qazuc eŋareocmu, i aricne. Mâro ruambiŋ eki dâŋ sasawa ŋaza qazuc eekac. Eme dâŋ i burec mâcne, i jâmbomac. Eme qazu-ŋarewec iŋuc maŋnao junšepieŋ. 28 Naru motecfâc-nane, ŋoŋe Kristo maŋnao junšepieŋ. Eme juku fua tâcneme qacfiric domanšepeneŋ, ehuc fifisi-ticnao mimišu qâšušu ehuc wise ŋeŋe uruŋ mi enšepeneŋ. 29 Anutu e tiŋne juekac, ŋoŋe iŋuc manaeŋgopieŋko ine ŋic moc tiŋnea jume honerâ munšepieŋ, Anuturaonec fuawec.